SAVOGNIN-RADONS-SAVOGNIN-TIEFENCASTEL

Organisatoren: Xandi und Rägi

 Am Samstig Morge hätt sich di ganzi Bike-Truppe im Zug troffe richtig Chur. D'Büch händ knurrt und sich uf de versprochnigi Brunch vom OK gfroit. D'Erwartige sind scho s'erste Mal übertroffe worde, de frischi Zopf vom Rägi isch vom Feinste gsi, es hätt aber bizz z'vill gha, mer händs fascht nöd möge. 

 Guet gstärcht simmer mitem Postauto vo Chur richtig Savognin. Zum Glück hätt Adis Bike (dur Rägi im noie Bikesack transportiert) überhaupt kei Gwicht, suscht wär's Postauto die steil Strass nöd durufcho.

 Bi de Savogniner Post hett de Rest d'Bikes gfasst, wo mit eme Speziallastwage vo Chur anetransportiert worde sind. Nachem Materialcheck, pumpe, fläschefülle und WC-Stopp isches denn losgange. De Rescht vom Brunch isch no uf d'Rucksäck verteilt worde und de vörig Schoggidrink hätt i Bidon-Halter Platz gfunde.

Bi de Talstation hämmer ois vo de Conny und de Judy trännt, sie händ di 1. Etappe uf d'Mittelstation mit em Sässelilift überwunde, de Rescht isch i de wunderschöne Mittagshizz richtig Gipfel lostramplet. Nach einige Kurve und villne Schweisstropfe hämmer alli d'Mittelstation Tigignas erreicht womer s'erste Mal e Stärchig brucht händ.

D'Downhill- Truppe isch scho ganz nervös gsi und i de Startlöcher für de Downhill nach Savognin zrugg.

De Rescht hett di 2. Etappe richtig Bergstation Radons in Agriff gno. 

d'Sunne hätt ois de Ufstig nöd liechter gmacht, aber d'Landschaft und die herzige Dörfli hend ois vom Trample abglänkt und ois dopplet entschädiget. Natürli händ mer au as Calanda dänkt wo ois im Berghaus Radons erwartet hätt. 

Nach em 1. Durstlösche isch au scho d'Downhill-Truppe zu ois gstosse, wo ihres Calanda dopplet verdient hätt. Sie sind nach dä halsbrecherische Downhillstrecki, wo all guet überstande hend, (sowieso die ohni Gabelfäderig), vo Savognin id Mittelstation mitem Sässelilift und denn au trampelnd id e Bergstation acho. Mer händ uf de schöne Terasse no d'Sunne chönne gnüsse und händ druf g'achtet dass mer de Flüssigkeitshushalt wieder chönd is Glichgwicht bringe. 

Nachem Zimmerbezug und dä verdiente Duschi hämmer mit chnurrende Büch uf de Znacht gwartet. S'Esse isch mega gsi, und es hätt sportlichi Portione geh! D'Chnoblipizokkel händ ihri Würkig hinderlah, sowie au de Malanser, s'Calanda, d'Grappas u.s.w. S'Berghaus Radons isch au Zwüschezitlich im Nebel gsi, wo öppe 7 Gipfelzigarre entfacht worde sind.

Di ganz Muetige händ dänn uf all das abe no en Lumumba mit em im Bidonhalter transportierte Schoggitrink abegstürzt. De Muet hätt sich glohnt, jezz isch au d'Chöchin für's 24-h Renne gsicheret. (Was mer nöd alles so verspricht zu später Stunde..)

Eigentli hätt's einigi Highlights geh am Abig:

- Wädi's Röteli-Rundi zu sim Geburri

- Xandis Red als Präsident zum 10-Jährige Bike-Weekend Jubiläum

- D'Freibier oder au d'Frei-Malanser Rundi zum 10-Jährige Jubiläum

- Em Rägi sini Red zu sim persönliche 10-Jährige Biketour Jubiläum (Helm ab!!)

- Bilder-Rücken dur gwüssi Dame

- und suschtigi Rede dur anderi redseligi Biketourteilnehmer

- ..u.s.w.

Nach dem ereignisriche 1. Tag simmer all früener oder au spöter kabutt is Bett kroche und händ vo de bevorstehende Talabfahrt troimt.

De Sunntig hätt mit strahlendem Wätter mega agfange, obwohl bi de Einte chli de Chopf brummt hett (ob vo de Sunne, de Asträngig oder em Isostar lömmer de Fantasie überlah) händ sich all zum Zmorge chönne ifinde und frisch gstärcht hämmer denn d'Abfahrt in Agriff gno.

Durab isch's rasant dur de Wald und bals simmer au scho vor em Schild Downhill-Strecke gstande. D'Muetsuppe vom Samstig-Abig hätt sini Würkig zeigt, es händ all s'Ziel in Savognin mit glühende Bremse erreicht und händ trotz zitterne Ärm alli Kurve verwütscht. 

Denn hätt sich oisi Truppe ufteilt. Di Einte sind is Savogniner Parkplatzseeli go bade und die ganz wilde Biker händ no d'Tour C in Agriff gno, nomal 600 Höhemeter. Es hett sich aber schinds glohnt. De Kommentar isch gsi: uff, stöhn, ächz, schwizz.

Am Seeli isches mega gsi, mer händ s'chüele Nass gnosse und chli chönne Bergsunne tanke.

Nach de Seepause hett sich d'Gruppe nomal teilt. Es paar sind em Bach nah richtig Tiefechastel und de Rest händ nomal de Weg über's oberhalb a Savognin liegende Salouf in Agriff gno und sich d'Abfahrt über Wanderweg, Wurzle und Gras nach Tiefechastel erstramplet. Traditionell händ au dasmal d’Bikes zwüschezytlich müesse treit werde.

Vorem Bikeverlade und warte uf de Zug hätts als Belohnig nomal es Calanda gäh für di Einte und suschtigi Erfrischige. Di Rätisch Bahn hätts denn au no spannend gmacht, mer hetted fascht de Zug in Chur nach Züri verpasst, zum Glück hätt de lieb Zug aber gwartet und mer händs gad no gschafft zum wartende Zug überezflizze.

Gschafft und müed simmer im Zug, teils vo Spaghetti, Lasagne, Pizza und Zopf troimend und vorfroidig uf d'Duschi und s'Bett heigfahre. In Dietike hemmer ois verabschiedet. S'Einte Grüppli isch hei uf Killwange, de Rescht uf Rudolfstette und Bremgarte und is Wallis. 

S'Bikeweekend isch wieder mal mega gsi und es händ sicher all de Pläsche gha.

Merci villmal de Organisatore Rägi und Xandi!!

S'Brichtlischribteam 

Simi+Tim

12.08.2010